२६ साउन, पोखरा । पछिल्लो केहि साता देखी कोरोना भाइरस (कोभिड–१९) का संक्रमितको संख्या ह्वात्तै बढपछि पोखराका अस्पताल फेरि भरिभराउ हुन थालिसाकेका छन् ।

पश्चिमाञ्चल क्षेत्रीय अस्पताल र सरुवा तथा संक्रामक रोग अस्पतालमा संक्रमितले वेड नपाउने अवस्था आएको छ । पछिल्लो साता संक्रमितको संख्या नपत्याउँदो गरी बढेकाले आईसीयूमा भर्ना हुन आएका संक्रमितले पालो कुर्नुपर्ने अवस्था आएको पश्चिमाञ्चल क्षेत्रीय अस्पतालका कोभिड फोकल पर्सन डा. शरद बराल बताउँछन् ।

अस्पतालमा कोभिड-१९ का बिरामीका लागि ८० बेड छुट्याइएको छ । तर सबै बेडमा बिरामी छन् । ‘पालो कुरेर पनि उपचार नपाउने स्थिति आइसक्यो,’ डा. बराल भन्छन्, ‘गम्भीर प्रकृतिका बिरामी धेरै छन् । बेलैमा ध्यान नदिए झन् स्थिति भयावह बन्छ ।’

 निषेधाज्ञा कडाइ गर्न सुझाव 

प्रदेश स्वास्थ्य निर्देशनालयले निषेधाज्ञा खुकुलो भएसँगै चहलपहल बढ्दा संक्रमणदर बढेको बताएको छ ।

निर्देशनालय प्रमुख खिमबहादुर खड्काले निषेधाज्ञा खुकुलो भएसँगै जनस्वास्थ्यका मापदण्ड पालना नभएको र अब कडाइ गरिनुपर्ने बताए । ‘अब सबै आआफ्नै तवरबाट सचेत हुनुपर्ने बेला भइसक्यो,’ निर्देशक खड्काले भने, ‘आज बिहान पनि सिडिओ सा’बलाई निषेधाज्ञा कडाइ गर्न सुझाव दिएका छौं ।’

खड्काले सार्वजनिक स्थान र यातायातहरुमा भिडभाड नघटेको र सामान्य मापदण्ड पनि पालना नगरिएकाले समस्या भएको बताए । ‘गाडीमा त्यस्तै भिड छ, बाटोबाटोमा त्यस्तै भिड छ । अब आफैं सचेत हुनुपर्ने बेला भइसक्यो,’ उनले भने ।

संक्रमण बढेको भन्दै बागलुङ जिल्ला प्रशासन कार्यालयले बिहीबारदेखि लागू हुने गरी अत्यावश्यक बाहेक बैंक तथा वित्तीय संस्था नखुल्ने गरी निषेधाज्ञामा कडाइ गरेको छ । प्रशासनले बिहीबारदेखि भदौ ५ गतेसम्म तोकिएका विश्वाविद्यालयका परीक्षा र स्वास्थ्य क्षेत्रबाहेक सम्पूर्ण क्षेत्र बन्द गर्न सूचना जारी गरेको छ ।